في داخلي شي عن الناس مستور

في داخلي شي ٍ عن الناس مستور
حرك سكون القلب .. والقلب لباه


شي ٍ غريب من اغرب انواع الشعور
عجزت ادور وش هو سره ومعناه


مدري غلا .. ولا حزن .. ولا سرور
مدري بداية فرح .. ولا معاناه !


لي صاحب ٍ في طلته يشرق النور
ولاغاب عني .. غيب النور وياه


من يوم شفته والحشا فيه مبهور
حلو الوصايف كل شين يتعداه


للزول هيبه والحكي مابه قصور
أشغل فضا فكري بذكره و طرياه


لا مر طيفه يرقص القلب مسرور
و يتبع سروره رغبة ٍ في ملاقاه


معذور قلبي لو تمناه معذور
الطيب كله ساكن ٍ في محياه


عن غيبته اصبحت مالي بمقدور
نار الوله تشتعل بي بععد فرقاه


قلبي فبعاده حاير ٍ حيل مكسور
يالله ترسي مركبي صوب مرساه


وافي و اسمه دوم بالخير مذكور
عسى السعاده ماتفارق شفاياه